Joseba Zuloaga puntista donostiarra (Argazkia: Jai Alai)

Jai Alai enpresak jakinarazi duenez, Joseba Zuloaga donostiarrak debuta egingo du puntista profesional moduan, Filipinetan. Santa Ana Cagayan Valley herriko Bizkaia frontoia ezagutzeko, lehen probak egin ditu dagoeneko 22 urteko aurrelariak. Inguru horretan ohikoa den moduan, dagoeneko ezizen bat jarri diote Zuloagari, Bazooka, hain zuzen ere.

Filipinetako frontoiak 40 puntista inguru mugitzen ditu, gehienak Filipinetakoak dira, baina badira maila handiko euskal puntistak tartean: Ugarte, Zeleta, Blazquez eta Gorostola, besteak beste.

Euskal Kostaldeko Museoen sarea osatu duten kideak. (Argazkia: Aquarium)

Donostiako San Telmo Museoak, Ontzi Museoak eta Aquariumak egin dute bat Euskal Kostaldeko Museoen sarearekin, eta larunbatean ekimen bereziak prestatu dituzte hiru museoetan.

Gaur aurkeztu dute Euskal Kostaldeko Museoen sarea Aquariumen. Bizkaia eta Gipuzkoako 43 museok osatu dute sarea, Donostiako hiru museo tartean, eta euskal kostaldeko itsas ondarea zaintzeaz gain, aberastasun hori hiritarrei nahiz bisitariei erakustea izango dute helburu.

Horrela, lankidetzarako gune bihurtuko da Euskal Kostaldearen Museoen Sarea, eta asteburuan hainbat ekimen burutuko dituzte sorrera berria ospatzeko.

Donostiako hiru museoetako egitaraua
-Aquarium: larunbatean bisita gidatua egingo dute 11:00etan, eta Bazen behin uharte bat filma eskainiko dute 12:00etan.

-Ontzi Museoa: 1813. Donostiaren setioa, sutea eta berreraikitzea erakusketaren muntaia ikusteko bisita gidatua egingo dute. Ostiral eta larunbatean 17:30ean, eta igandean, 12:30ean. Bestalde, larunbatean, 1813. Donostiatik ibilbide historikoa egingo dute. Jarduera hauetan parte hartzeko aurrez izena eman behar da (943430051)

-San Telmo Museoa: Itsasoa zabalik ikus-entzunezkoa eskainiko dute 10:00etatik 20:00etara.

Lagunak Elkarlanean ikuskizunaren aurkezpena; ezker eskuin: Agurtzane Garai museoko teknikaria, Susana soto museoko zuzendaria, Oscar Lopez Kaabestri taldeko musikaria, eta Joseba Errekalde Harri beltza elkarteko presidentea (Argazkia: E. Zabala)

Lagunak Elkarlanean izeneko elkartasun ikuskizuna egingo dute San Telmo Museoaren elizan. Musika eta dantza batzen dituen emanaldia datorren asteartean izango da, ekainaren 25ean, 20:30ean, eta bildutako dirua GIB birusaren aurka borrokatzeko izango da. Zehazki, Harri Beltza elkarteak jasoko du dirua, HIESa duten gaixoei eta euren gertukoei laguntzeko lan egiten duen irabazi asmorik gabeko elkartea.

Kaabestri taldea eta bi dantzari izango dira ikuskizunaren protagonistak. Euskadiko Orkestra Sinfonikoko musikari batzuek sortu zuten Kaabestri; harizko laukotea da eta honakoek osatzen dute: Oscar Lopez (biolina), Igor Torre (biolina), Arkaitz Martinez (biola) eta Jon Larraz (txeloa). Beraiekin batera izango dira eszenatoki gainean Biarritzeko Balleteko bi kide: Fabio Lopez eta Ellyce Danielle.

Joseba Errekalde Harri Beltza elkarteko presidentea da, eta esker hitzak izan ditu bai museoarentzat bai musikari eta dantzarientzat ere. “HIESak oraindik jendea hiltzen du. Gizarteratzeko arazoak daude , eta halako ekimenek arazoa kalera ateratzen laguntzen digute”, aipatu du Errekaldek.

Sarrerak bost eurotan salgai daude San Telmo Museoan bertan, eta 0 lerroa deituriko elkartasun sarrerak ere eros daitezke prezio berdinean. Hala, ikuskizunera joan ezin duenak ere bere laguntza emateko aukera izan dezan.

EGITARAUA:

• Georg Philipp Teleman (1681-1767). Ouverture-Suite ‘Burlesque de Quixotte’, TWV 55:G10
• Carl Philipp Emmanuel Bach. Sinfonia Wq 182 N°5 in B minor for strings and continuo
• Karl Jenkins Palladio. Concerto Grosso for string orchestra (I movement) 1995
• Xabier Zabala: Harizkoentzako adagioa.
• Peter Warlock: Capriol Suite, for string orchestra 1926
• Richard Wagner. Tristan und Isolde, prelude.  Xabier Sarasak moldatua eta Fabio Lopez-en koreografia.

Izagirre eta Albizu. (Argazkia: Agurtzane Altuna)

Udal gobernuak ostiralean onartuko ditu kontratazio publikoak egiteko bete beharreko jarraibideak. Horien arabera, aurrerantzean egingo diren kontratu publiko guztiek gizarte, ingurumen, etika, lan baldintza, hizkuntza eta berdintasun erizpideak bete beharko dituzte.

Juan Karlos Izagirre alkatearen arabera, “administrazioa egokitu behar da jendearen beharretara eta ez alderantziz, beraz, administrazio publikoarentzako lan egiten duten guztiek oinarri batzuk bete beharko dituzte”.

Jon Albizu, Gizarte Ongizateko zinegotziak administrazio publikoa eredu izan behar duela adierazi du, eta “diskurtsoek eta ekimenek eskutik joan behar dute”, gaineratu du. Beste ekonomia eredu baten aldeko apustua egin nahi dutela azpimarratu dute bi udal ordezkariek, eta baloreen errespetuan oinarritutako kontratazioak egitea izango dela lehen urratsa.

Iñigo Aguayo kazetaria arduratu da Esperanza elkartearen historia idazteaz. Hiru urte behar izan ditu liburua osatzeko, horietako bi ikerketa lanetan eman ostean. Denbora tarte horretan, asko ikasi du bai elkarteaz bai Parte Zaharraz, eta bere esperientziaren berri eman dio IRUTXULOKO HITZAri.

Txema Hernandez, Axier Jaka eta Ane Rodriguez, Tabakalerako zuzendaria. (Argazkia: Agurtzane Altuna)

Aurtengo eskaintzaren amabitxia Ane Rodriguez izango da, Tabakalerako zuzendaria. Izan ere, espazioan duten gertutasunaz gain, Kristina Eneako Ingurumen Baliabideen etxea eta Tabakalera elkarlanean aritu dira hainbat jarduera prestatzen, Egiako parkean bertan egingo den Zinesaurioak zinemaldia, adibidez.

Donostian barrena egingo diren bisita gidatuak ere bi erakundeen elkarlanaren ondorio izango dira. Bisita hauen bidez, hiriko kale, horma edo zubietan aurki daitezkeen aztarna geologikoak ezagutuko dira, Jose Mari Hernandez geologoaren eskutik.

Tailerren artean, Hiriko nekazari txikiak izan daiteke aipagarrienetako bat. Uztaila hasieran egingo dute Lugaritz eta Intxaurrondo kultur etxeetan, eta gaztetxoei baratzeko lanak modu didaktiko eta dibertigarrian erakustea izango du helburu.

Ostiralean emango zaie hasiera jarduerei. Erakusketak, hitzaldiak, ikastaroak, irteerak eta beste hainbat jarduera izango dira aukeran, eta Cristina Enea Fundazioaren webgunean eskura daiteke guztien berri zehatzago.

Sustapenak abiatu dituen 90 beken aurkezpena. (Argazkia: Agurtzane Altuna)

Sustapenak atzerrian ordaindutako praktikak egiteko 90 beka eskainiko ditu, bi egitasmoren bidez: 60 Global Training beka eta Leonardo da Vinci mugikortasunerako 30 beka.

Ekimen hau Donostiako Ekonomia Sustatzeko Planaren beste neurri bat da, Donostiako gazteen laneratzea ahalbidetu nahi duena. Hala, aukeratutako gazteek atzerrian sei edo zortzi hilabetez soldatapeko praktikak egiteko aukera izango dute.

Josu Ruiz, garapen ekonomikoko zinegotzi ordezkariaren esanetan, “ezin dugu onartu gure gazteen gaitasuna ez aprobetxatzea, beren trebetasunak erakusteko aukerarik ez dutelako”.

Beka hauek hainbat esparrutan lan egiteko aukera eskaintzen dute: merkatu azterketak, turismo garapena, teknologia berriak…Eta AEB, Bolivia, Txina, Mexiko, Argentina, Alemania eta beste hainbat herrialdetara jo daiteke. Horregatik, beka hauek eskatzeko beharrezkoa da ingeles ezagutza altua izatea.

Iaz atzerrian praktikak burutu zituzten bekadunetatik herena baino gehiago dagoeneko lanean ari dira. Dena den, Sustapenak konpromiso bat hartu du talentua hirira itzularazi eta Donostiako enpresa sarea babesteko. Ildo horretatik, lan saioak burutzen dira bekadunekin. Praktikak amaitutakoan atzerriko merkatuan jasotako esperientzia eta ezagutza partekatzen dute tokiko enpresekin, nazioarteari begira, lankidetza eta negozio aukera berriak sustatzeko.

Global Training 2013-2014 beketan izena emateko epea irekita dago eta uztailaren 15ean amaituko da. Izen ematea Fomentosansebastian.org webgunean egin behar da eta dokumentazioa aipatu epearen barruan eta paper-formatuan aurkeztu beharko da Victoria Eugenia antzokian Donostiako Sustapenak duen bezeroen arretarako bulegoan. Leonardo bekak, berriz, uztailean abiaraziko dira.

Ingelesen Hilerrian lanean aritu diren gazteak, eta aurkitu dituzten hiru gorpuzkin. (Argazkia: Agurtzane Altuna)

Ingelesen Hilerrian berreskurapen arkeologiko eta antropologikoak egiten aritu dira lehen aldiz. Ekainaren 3an hasi ziren indusketa lanak eta ostiral honetan amaituko dituzte. Aranzadi Zientzia Elkarteko kideen gidaritzapean, 17 eta 18 urte bitarteko 29 gazte aritu dira, borondatez indusketa lanak egiten.

Hiru hobi egin dituzte, eta bost gorpuzkin aurkitu dituzte. Horietatik hiru, nahiko egoera onean daude, eta datu asko biltzea espero dute. Hiru gorpuzkin oso osorik daude; gazteak ziren denak, 16 urte ingurukoa horietako bat. Dena dela, Lurdes Errasti arkeologo eta historialariaren esanetan, “hobekien dauden hiru gorpuzkinak aztertuta ikusi dugu, hezurretan ez dutela zauririk, baina bala zatiak ere aurkitu ditugu, beraz, tirokatuta hilak dira. Dena den, ez dago pertsona hauek identifikatzen dituen aztarna argirik. Hau da, ez dago jakiterik soldadu frantsesak edo ingelesak ziren”. Orain, Aranzadiko Antropologia Fisiko saileko lantaldea ari da aztarnak aztertzen.

Izan ere, Ingelesen Hilerrian ehortzitako gorpuzkin gehienak 1836 eta 1837 urtekoak dira, Donostiako aldirietan hildako Legio Britainiar Laguntzaileko ofizialenak, baina baliteke 1813ko gorpuzkinen bat ere egotea tartean. Frantsesen hilobi kolektibo bat dagoenaren susmoa ere bada, baina momentuz ez dute topatu.

Hiru gorpuzkin aurkitu dituzten hobia. (Argazkia: Agurtzane Altuna)

Hobi honetan beste bi gorpuzkinen zatiak topatu dituzte. (Argazkia: Agurtzane Altuna)

Dena dela, argi dago gazteek aurkitu dituzten bost gorpuzkinak zerraldoetan zeudela, beraz, aurkikuntza hauek Urgulleko inguru honetan gudan hildakoak lurperatzeko zegoen ohitura berresten dute.

Lurzorua garbitu, harriak atera, lurra mugitu…lan neketsua izan dela aitortu dute indusketa lanetan parte hartu duten gazteek, baina oso “aberasgarria”. 2013tik 1813ra gazteen auzolanez ekimenaren bidez ikusi eta ikasi duten guztia Ingelesenhilerria.blogspot.com.es webgunean

Tomas Hernandez, Iñigo Aguayo eta Roberto Aretxaga, gaur goizeko aurkezpenean (Argazkia: Nagore Koch)

Parte Zaharreko Esperanza Kirol Elkarteak ehun urte bete zituen 2012an. Mendeurrena ospatzeko hainbat jarduera egin zituzten, eta horien artean, elkartearen historia bilduko zuen liburu bat egitea erabaki zuten. Elkarteko mendeurren batzordeak duela hiru urte egin zion liburua idazteko enkargua Iñigo Aguayori, eta iaz horretan lanean ari zela elkarrizketa egin zion IRUTXULOKO HITZAk. Elkarteko bazkidea izateaz gain, kazetaria ere bada Aguayo, eta pozez hartu zuen lana. Guztira, 10.000 egunkari zahar inguru irakurri behar izan ditu Aguayok dokumentatzeko, ondoren, sei hilabetez liburua idatzi du, eta beste sei hilabete erabili ditu zuzenketak eta azken ukituak emateko. Elkartearen asmoa liburua 2012ko abenduan argitaratzea zen, baina azkenean,  gaur egin dute 230 orriko liburuaren aurkezpena, elkartean bertan.

Tomas Hernandezek ere lan asko egin du liburua osatzeko, izan ere, bera arduratu da argitalpenean ageri diren marrazki guztiak egiteaz eta maketazioaz. Roberto Aretxaga, berriz, argazkiak bildu eta txukuntzeaz arduratu da.

Esperanza, gaur egun, gastronomia elkarte bat dela esan daiteke, baina ehun urteko historian kirolarekin oso harreman estua izan du. Parte Zaharreko lagun talde batek sortu zuen elkartea, futbol talde bat osatuz, eta ordutik, beste hainbat kirol egin dituzte bertako bazkideek: Atletismoa, pilota, patin gaineko hockeya, txirrindularitza, eskubaloia… lorpen garrantzitsuenen artean, ordea, arraunean lortutakoa dago. Izan ere, La Esperanza izan zen Kontxako Bandera eskuratzea lortu zuen azken traineru donostiarra.

Prentsaren aurrean aurkezpena goizean egin duten arren, lagunentzako eta elkarteko kideentzako aurkezpena egingo dute gaur, 19:00etan.

Santa Maria elizako organoa. (Argazkia: Nagore Koch)

Santa Maria elizako Cavaille-Coll organoaren 150. urteurrena ospatzeko ostegunean eskaini behar zuten kontzertua berta behera geratu da.

Organoa Cavaille-Coll, Pariseko etxeari eskatu zitzaion, garai hartan Santa Maria elizan zeukaten XIX mendeko organo zaharra ordezkatzeko. 1863ko ekainaren 20an eskuratu zuten organo berria.

Hala, 150. urteurrena dela eta, aurten Santa Maria elizako Cavaille-Coll Organoaren Lagunen elkarteak hogei bat kontzertu antolatu ditu Donostiaren erreketa, suntsiketa eta berreraikuntzaren Bigarren Mendeaurrenaren oroitzapenerako programazioaren barnean.