Bukatu berri den KAE-1 Ligan lan txukuna egin du Donostiarra-Kaiarribak eta laugarren postuan sailkatu da; Jose Ramon Mendizabal entrenatzailea pozik dago taldearekin.

Donostiarra, ziaboga hartzeko prest (Argazkia: Maider Celada / KAE Liga)

Bukatu da KAE-1 Liga; gizonezko traineruen bigarren maila gorena. Donostiarra-Kaiarriba, hiriko trainerua, bertan lehiatu da aurten ere, eta laugarren postuan bukatu du. Jose Ramon Mendizabal, Mendi, taldeko entrenatzailea, pozik dago osatutako denboraldiarekin, eta Irutxuloko Hitzarekin egin du errepasoa. «Iazkoa hobetzeko, Ohorezko Txandan sartzera behartuak ginen. Laugarren postuan bukatu dugu, Ohorezko Txandaren barruan eta orokorrean gustura gaude», dio Mendik.

Liga ekainaren 26an abiatu zen Errioxan, eta duela bi egun bukatu zen Santoñan. Guztira 14 estropada jokatu dituzte eta laugarren eta bosgarren postuak izan dira Torrekuak gehien errepikatutakoak. «Iaz baino maila gehiago izan du aurtengo Ligak. Lortu duguna baino gehiago egitea zaila zen; jauzi handia baitago hirugarren postuan geratu den Lekittarra eta gure artean», argitu du. Lekittarraren aurretik geratzea lortu ez badu ere, lehenengo gipuzkoarraren postua irabazi du Donostiarrak Ligan. «Zarautz eta gure artean lehia egon da eta azkenean guk eramango dugu lehen talde gipuzkoarraren bandera. Beti eskertzen dira halako sariak».

Ezustekoren bat ere eman du Donostiarrak. Horien artean dago, abuztuaren 20an Bilbon jokatutako estropada. Izan ere, ia Ligako lehia guztietan gertatu bezala, Bandera Portugaletek (19:55) eraman bazuen ere, Donostiako ontzia izan zen bigarren sailkatua (20:19). «Poz handia hartu genuen egoera kontuan hartuta, erlojupekoetan ez baitago alderik. Azkenean, Ligan zorte txarra izan dugu ona baino gehiago, eta taldeak egindako estropada on asko ez dira emaitzetan islatu». Hurrengo egunean, berriz, Hondarribian izan zuten estropada. Berriro ere irabazlea izan zen Portugaleterengandik denbora berdinera geratu zen Donostiarra. Tartean, ordea, beste hiru ontzik denbora hobea osatu zuten, eta Donostiarra bosgarren tokian sailkatu zen. «Estropadako kaleek eta lehenengo minutuetan egindako lanak eragin handia izaten dute emaitzetan».

Portugalete guztien gainetik
Fitxaketa garrantzitsuak egiteari esker, Portugaletek Ligako jaun eta jabe izatea lortu du. «Portugaleteren helburua maila igoera lortzea zen, eta ziur aski lortuko du. Zierbena geratu da bigarren, azken urteetan egindako goranzko bideari esker, kalitatezko taldea baitu. Lekittarra betiko moduan aritu da, eta lan ona egin du. Santurtzik zorte txarra izan duela esango nuke eta Zarautz, berriz, jaitsi berria izateko, oso ongi aritu da».

Bere taldeari dagokionean, ongi erantzun duela dio Mendik. Bereziki, iazko taldearen muina mantentzea lortu dutelako. Gainera, beheko taldetik igotako gazteek ere lehiatzeko aukera izan dute. Gazteek «dezente» arraun egin dutela dio Mendik eta beraietako bat ia estropada guztietan aritu dela. «Igo nituenean banekien ez zirela titular ziurrak izango, baina ez nituen beti aulkian utzi nahi, horretarako hobe baitzuten beheko taldean jarraitzea».

Arkaitz Diaz patroiarekin ere ezin gusturago dago Mendi. «Donostiarra da eta bertako traineruarentzat ezin egokiagoa. Gainera, lanarekin koordinatzeko zituen arazoei aurre egiteko ahal zuen guztia egin du».

Traineru arteko lehia zuzenean itsasoarekin lotzen den arren, bat baino gehiago izan dira aurten KAE Ligan itsasotik kanpo jokatutako estropadak. Liga hasieran ibaian lehiatu behar izan zuten, baita itsasoa zegoen herrietan ere. Orion, esaterako, jai eguna zela eta, ibaian izan zen estropada, jai girotik gertuago izateko. Horrek ez dio mesederik egin Donostiarrari, argi geratu baita hobeto moldatzen dela itsasoan; eta zakarra bada, oraindik hobe. «Diru aldetik merkeagoak eta antolatzeko errazagoak dira ibaiko estropadak. Horrek eragina izaten du taldeen osaketan, talde trebeak baino, indartsuak behar baitira».

Oraindik ez da lana bukatu
Ligari agur esan badio ere, oraindik Donostiarrak ez ditu denboraldiko lan guztiak bukatu. Izan ere, Donostiako ontzia da datozen bi igandeetan Kontxako Banderan lehiatuko dela ziur dakien klub bakarra. «Liga bukatu arte esan nien ez niela Kontxaz hitz egingo. Beraz, orain iritsi da garaia». Entrenatzaileak badaki, noski, beraien maila baino gorago dauden traineruei aurre egin beharko dietela, baina taldea mailatik gorenena emateko prest dagoela dio.

Osteguneko sailkatze estropadari begira, TKE Ligako Ohorezko Txandan aritu diren lau ontziek ez dutela hutsik egingo uste du Mendik. Bestetik, Pedreña edo San Pedro ikusten ditu hautagaitzak. Hala ere, talde horia ere gogoan izan du: «Oriok ez du talde bezala parte hartzen Kontxan, herri bezala baizik. Beraz, orokorrean Orio sailkatzea ezustekoa izan badaiteke ere, niretzat ez litzateke izango». Gainera, aldaketarik ezean, Orio mailaz jaitsiko da eta lanean jarraitzeko arrazoi bat gehiago iruditzen zaio Mendiri: «Bai KAE Ligarentzat, bai Donostiarrarentzat, ona izango da Orio bezalako talde bat bertan izatea».

KAE-1 Liga: Sailkapen Nagusia
1. Portugalete 161 puntu
2. Zierbena 143 p.
3. Lekittarra 139 p.
4. Donostiarra 113 p.
5. Zarautz 109 p.
6. Santurtzi 101 p.
7. Deusto 80 p.
8. Santoña 73 p.
9. Hondarribia B 66 p.
10. Orio B 52 p.
11. Arkote 27 p.
12. Getxo 26 p.

Etiketak: arrauna, Donostiarra, jose, KAE, kaiarriba, Kontxa, Mendi, Mendizabal, ramon